बागचौर । बागचौर नगरपालिकाले गुणस्तरीय शिक्षा सुनिश्चित गर्ने उद्देश्यसहित शुक्रबारदेखि “शैक्षिक सुधार महाअभियान वर्ष” सुरु गरेको छ। नगरस्तरीय प्रधानाध्यापक बैठकमार्फत गरिएको घोषणामा शिक्षा सुधारलाई नगरको शीर्ष प्राथमिकताका रूपमा अघि सारिएको हो।
बैठक नगर प्रमुख तथा शिक्षा समिति अध्यक्ष जनकराज गौतमको अध्यक्षतामा सम्पन्न भएको थियो। कार्यक्रममा निमित्त प्रमुख प्रशासकीय अधिकृत, वडा अध्यक्ष, शिक्षा समिति सदस्य, शिक्षा शाखा प्रमुख, कर्मचारी तथा नगरका सबै सामुदायिक र संस्थागत विद्यालयका प्रधानाध्यापकहरूको उपस्थिति थियो।
अभियानका प्रमुख योजना
एक कक्षा–एक शिक्षक : जहाँ विद्यार्थी त्यहाँ शिक्षक
जीवनपयोगी र प्रविधिमैत्री शिक्षा : परीक्षा मात्र होइन, सीपमूलक सिकाइ
छात्रवृत्ति तथा निःशुल्क पोशाक : विपन्न, अपांग र जेहेन्दार विद्यार्थीका लागि
बालमैत्री, अपाङ्गमैत्री, हरित र स्वच्छ विद्यालय वातावरण
डिजिटल हाजिरी र प्राविधिमैत्री सिकाइ
शिक्षक तथा कर्मचारी क्षमता विकास र अनुगमन
विद्यार्थी नेतृत्व विकास : रेडक्रस र बाल क्लबमार्फत
परीक्षा सञ्चालन, परिणाम आधारित सम्मान तथा प्रोत्साहन
नगर प्रमुख गौतमले भने, “शिक्षा नै विकासको आधार हो। ‘एक कक्षा, एक शिक्षक’ अवधारणालाई प्रभावकारी बनाउँदै, अभिभावक सचेतना अभिवृद्धिका लागि ‘चुले सिकाइ’ कार्यक्रम लागू गर्दै गुणस्तरीय शिक्षा सुनिश्चित गर्ने हाम्रो लक्ष्य हो।”
शिक्षा शाखा प्रमुख नरेन्द्र प्रसाद भट्टले बताए, “शिक्षा गुणस्तर वृद्धि, शिक्षक अभिवृत्ति र विद्यार्थी सिकाइ सुधार हाम्रो पहिलो प्राथमिकता हो। यस अभियानमार्फत दिगो शैक्षिक सुधारलाई ठोस कार्ययोजनामा कार्यान्वयन गरिनेछ।”
हाल बागचौरमा ७२ बालविकास केन्द्र, ६८ आधारभूत विद्यालय, १३ माध्यमिक विद्यालय र ६ संस्थागत विद्यालय सञ्चालनमा रहेका छन्। नगरपालिकाले यी सबैलाई क्रमशः गुणस्तरीय र नमुना विद्यालयमा रुपान्तरण गर्ने लक्ष्य लिएको छ।
बैठकमा सहभागी सरोकारवालाले अभियानमा ऐक्यबद्धता जनाउँदै नगरस्तरमा गुणस्तरीय शिक्षा जीवन्त बनाउन प्रतिबद्धता व्यक्त गरेका थिए।
Error generating audio.